Sidii ay u joogtay ayey maalin kaliya qaraxday sidii bac la afuufay, kadibna reerkii iyo wixii ay ahaayeenba way burburisay iyadoon ka fikirin natiijada ka iman doonta ficilkeedaa. Naagtii way isku buuqday oo waali ayey in yar u jirtaaye quraan hala saaro ayaa lagu wada dhawaaqay.... Caruurta guriga halaga kaxeeyo intayna dilin.... Dumar wadaadada cunto u kariya haloo yeedho... horta mala is waydiiyey gabadhu inay caadi tahay iyo in kale maxaynu la dagdagaynaa...... Maya ninkeedii ayaaba wax loo saaray oo ayna arki karinba ee sideed u hadlaysaa....

Wadaado ayaa la keenay gabadhii iyadoon la su’aalin sideey wax u jiraanba... isla markiiba maryaa lasoo saaray kadibna quraan ayaa hareeraha lagala fadhiistay. Maadaama oo qur’aanka lagu dago gabadhii maalmo ayey iska aamusnayd iyadoo dagan, ninkii iyo caruurtiina ay guriga sidoodii hore ugu soo noqdeen. Sidii caadada u ahayd ayuu ninkii siduu samayn jiray uu ku noqday, wuxuu iska dhaadhiciyey naagta shaydaan ayaa maalmihii galay sidaa darteed ayey la qaylinaysay waxna la jajabinaysaye, adiga ciladu may ahayn.... sidaa ayuu isku qanciyey.

Maalmo yar kadib ayuu maalin guriga soo galay gurigii oo ay ciyaalkii is dhex yaacayaan, gurigii oo aad moodo inay dad isku laayeen. Isla markiiba wuxuu ku dhawaaqay hooyadiin meeday maxay guriga idiinku eegaysaa.... guriga gudaha markuu usoo galay wuxuu arkay iyadii oo sofa-ha ku jiifta oo timaheeda ku ciyaaraysa. Intuu xanaaq buuxsamay ayuu markaliya ku dhawaaqay....naa ma waalidii ayaa kugu soo noqotay maxaad caruurta sidan ugu eegaysaa. Sidii ay rabtay ayeyba sheekadu u noqotaye, markaliya intay soo booday iyadoo ciilka ka muuqda uu dad dili lahaa ayey qaylo af labadii yeedhay, HAAAAAAA waan waashay ee hawada ii banee, intay tidhi ayey miiskii hor yaalay gidaarka ku tuurtay iyadoo wali qaylinaysa, intuu isagiina garbaduub u qabtay ayuu qol kusoo xidhay isagoo caruurtiisii kuleh banaanka u baxa oo kusoo ciyaara. Isla markiiba wuxuu diray tlf uu ugu yeedhayo ehelkeedii isagoo leh gabdhiinii way waalatay ee soo gaadha.

Hmmmm gabadhu maxay la waalatay oo sidan uga qaylisiiyey, horta miyey waalatay mise wax kale ayey la qaylinaysaa oo cid waydiisa ayey la’dahay, bal sanado yar kahor sidii ay reerkani u noolaayeen aan dib ugu noqono.

Iyada oo uu daal aad ubadan ka muuqdo ayey fadhidaa qolka dhakhtarka lagu sugo, afka ayey kolba gacanta saaraysaa iyadooy maskaxdeeda ay ka guuxayso.... uur 3aad ilmo 3aad... Ilaahoow ii ceeb astur... wax yar kadib iyadoo cago jiidaysa ayey kasoo baxday qolkii dhakhtarka, meel ay joogto iyo meel ay marayso isma oga, maskaxdeeda waxaa kasii qaylinaya.... kuwii horeba sidaan ku dhalay Ilaahay ayaa ogaa ee kana ma anigaa u taag haya... maxaan yeelaa doqonkii dhalayna siduu yahay waan ogahaye... sidii ay usoo socotay waxay isku tuurtay sariirtii hurdada, xubin kasta oo jidhkeeda kamid ahi waxay la qaylinaysaa daal iyo silic... waxaa kasoo daadatay ilmo kulul oo ayna ogayn sababta ay uga timid, intay soo fadhiisatay ayey dhabanada qabsatay iyadoy wali ilamadu ay ka daadanayso... intay kacday ayey gidaarka ku tiirsatay iyadoo isla hadlaysa... ma doqonkii aan ogaa ayaan ilmo kale udhali maantana... hadana sariirtii ayey kusoo fadhiisatay iyadoo ilmada iska tirtiraysa... acuudubillaahi minashaydaani rajiim intay tidhi ayey istaagtay... intay caloosheeda si naxariisleh gacanta usaartay ayey tidhi ma nimcada ilaahay ayaan ka ooyayaa, illaahoow isaamax...

Iyadoo wali iyadu isku maqan ayaa la soo garaacay albaabka, markay furtayba waxaa hortaagan gabadh ilmo sanad jira gacanta ku sidda.... oo waabad joogtaa.... intuu ilmihii isku soo tuuray ayuu ku dhagay hooyadiisa murugaysan.... raali noqo walaal waan yara mashquulsanaaye intay ugu jawaabtay gabadhii ayey albaabkii xidhatay... ilmihii ayey isku duubtay iyadooy ilmadu laabteeda qoysay... Lasoco